اته لس سوه جوانان د وینی بانک ته وینی ورکولو ته تیار دی
تاج محمد – خوست
په لومړي ځل د خوست د شېخ زايد پوهنتون محصلينو ددې لپاره چې په دې ولايت کې يې د هغو خلکو چې د وينې د کمښت له امله مرګ سره مخ وه د ژغورلو په موخه يې د "ځوان ويني بانک" پرانيست چې په لومړي ځل څه د پاسه اوه سوه محصلينو دې بانک ته وينه ورکړه.
سږکال د نوموړي بانک کليزه پر داسې مهال د يوې غونډې په ترڅ کې لمانځل کيږي چې د خوست والي عبدالجبار نعيمي سربېره د شېخ زايد پوهنتون مشر، استادانو، سلګونو محصلينو په کې برخه اخيستي وه.
د ځوان وينې بانک بنسټ ايښودنکي داود افغان غونډې ته وويل: د عاجلو پېښو پرمهال زياتو ناروغانو ځينې وخت د وينې د کمښت له امله ساه ورکوله، نو پرهمدې اساس چې د خلکو ژوند يې ژوغورلى وي، د ځوان وينې بانک یې جوړ کړى دى.
نوموړى وايي: "لومړي ځل هم کله چې دخوست په شېخ زايد پوهنتون کې د "ځوان ویني بانک" جوړ شو، 714 محصلينو څه د پاسه 35 زره سي سي وينې هدیه ورکړه."
د افغان په وينا: خوست چې يو پراخ نفوسه ولايت دى د ورځې په ګڼ شمېر کسان د خپلو ناروغانو د پاره چې وينې ته یې اړتيا درلوده راتلل. محصلين دې ته تيار دي چې د ناروغانو سره روغتون ته لاړ شي او هغوی ته وينه ورکړي.
د نوموړي په خبره: که د محصلينو په څېر نور خلک هم دې کار ته وهڅول شي نو د وينې د اړتيا پر مهال به ستونزه پاتې نه شي.
افغان وويل:" خوست کې د شېخ زايد پوهنتون 1800 تنه محصلين دې ته تيار دي چې د اړتيا پر مهال خپله وينه په وړيا توګه ناروغانو ته ور کړي."
د شېخ زايد پوهنتون د محصلينو نه په الهام اخيستو د کابل په ګډون د هېواد په ډيرو پوهنتونونو کې دې ته ورته د وينې بانکونه جوړ شوي چې د اړتيا پرمهال ناروغانو ته په وړيا توګه وينه ور کوي.
د خوست د عامې روغتيا سر پرست ریيس هديت الله حميدي وايي: د وينې په برخه کې له دې وړاندې د زياتو ستونزو سره مخ وه چې زياتره وخت ښځو د ماشوم د زيږونې پر مهال او هغه کسان چې په پيښو کې به ټپيان کېدل د وينې د کمښت له امله يې په روغتون کې ساه ورکوله.
هغه وويل: له هغه مهال راهيسې چې په خوست کې د ځوان وينې بانک جوړ شوی، د وينې د کمښت له امله د کسانو په مړينه کې کموالی راغلی دی.
د نوموړي په خبره، اوس ېې چې هر وخت وينې ته اړتيا شوه، ددې بانک له لارې به په وړيا توګه وينه لاس ته راوړي چې د خلکو ژوند و ژوغوري.
د خوست والي عبدالجبار نعيمي د شېخ زايد پوهنتون د محصلينو څخه مننه وکړه چې د خپلو هېوادوالو د ژوند ژغورلو په موخه وينه ورکوي.
نعيمي د ځوان وينې بانک سره د هر ډول همکاريو ژمنه وکړه او ترڅنګ د دوهم ځل لپاره خپله 500 سي سي وينه دغه بانک ته هدیه کړه.
د خوست د منګلو موسى خيلو ولسوالۍ يو تن اوسيدونکی شيرګل چې دولس کلن زوی يې د وينې د کمښت ناروغۍ سره مخ دى وايې چې د خپل ناروغ زوی د پاره يې هره مياشت پنځه سوه سي سي وينه ته اړتيا وي چې دغه کار يې يوې خوا کمزوري اقتصاد او بلې خوا د وينې د نه پيدا کېدو د ګڼو ستونزو سره لاس او ګريوان کړى وه.
د شيرګل په وينا: له کله چې ورته معلومه شوه چې دلته د وينې بانک جوړ شوى، هره مياشت پوهنتون ته راځي او محصلين په ورين تندي تر ملکي روغتون پورې ورسره راځي او ناروغ زوی ته یې وينه ورکوي.
هغه زياته کړه: دا څلورم ځل دی چې د خوست د شېخ زايد پوهنتون ته راځي او محصلين يې زوی ته وينه ورکوي. د ده په وینا که د پوهنتون محصلين نه وی نو اوس به يې زوی د وينې د کمښت د ناروغۍ له امله خپل خوږ ژوند له لاسه ورکړی وی.
د شېخ زايد پوهنتون د شرعياتو د پوهنځي استاد مولوي عطاالله د اسلام له نظره په وړيا توګه د وينې ورکول تر ټولو لويه صدقه وبلله او په نورو خلکو يې هم غږ وکړ چې د اړتيا په وخت کې روغتونو ته لاړ شي او د ناروغانو سره د وينې د کمښت پر مهال مرسته وکړي.
